Ciyaaryahanka Portugal iyo kooxda Manchester United Cristiano Ronaldo ayaa noqday ciyaaryahanka ugu fiican adduunka sanadda 2008 kadib codeyn xiriirka kubadda caalamka FIFA uu sameeyay.

Ronaldo oo 23 ah ayaa ka galay taariikhda albaabkeeda weyn bacdamaa uu noqday ciyaaryahankii ugu horeeyay ee ka ciyaara horyaalka Ingiriiska ee abaalmarintan ku guuleysta.

Ronaldo ayaana ka guuleystay dhamaan Ciyaaryahanka reer Brazil Kaka, Lionel Messi oo Argentina ah iyo labada Spanish Fernando Torres iyo Xavi Hernandez oo wareega ugu danbeeya ay isagu soo hareen. Lionel Messi ayaana labaad galay, halka kaalinta saddexaad uu ka helay Fernando Torres.

Ronaldo ayaana soo bandhigay qaab ciyaareed heer sare ah intii lagu guda jiray sanaddii na dhaaftay ee 2008 isagoo dhaliyay 42 gool dhamaan tartamadii uu ka qayb galay, wuxuuna kooxdiisa Red Devils ka caawiyay inay ku guuleystaan horyaalka Ingiriiska iyo koobka horyaalada yurub. wuxuuna ku guuleystay kabaha dahabka ah ee la siiyo ciyaaryahanka dhaliya goolasha ugu badan tartamada yurub, wuxuuna sanadiisa aan caadiga ahayn ee 2008 ku soo gebagabeeyay inuu kula guuleysto kooxdiisa koobka Intercontinental ee loo yaqaano koobka Toyota.

Cristiano Ronaldo ayaa ku guuleystay dhamaan abaalmarinaddii sanadaan isagoo hore ugu guuleystay ciyaaryahanka ugu fiican English Premiership-ka, kan ugu fiican koobka horyaalada yurub iyo xiddiga yurub ee ay majaladda France football bixiso.

Ronaldo wuxuu noqonayaa ciyaaryahankii labaad ee Portugal ah ee noqda ciyaaryahanka adduunka ugu fiican iyadoo uu ka horeeyay Luis Figo oo ku guuleystay sanaddii 2000.

Wararkaan Sports waxaa diyaariyay

C/Naasir Maxamed Axmed (Zerrro)

zerro77@hotmail.com