Iyadoo ay maalin qura ka harsantahay go'aan ka gaarida kooxdii si toos ah ugu soo gudbi lahayd Sideeda kooxood ee ugu danbeysa Quarter finals ayaa waxaa sii socda faalooyinka ay samaynayaan ciyaaryahanada kooxda Real Madrid si ay isaga yareeyaan culayska saaran kadib markii natiijo 1-0 ah gurigooda lagu baday ciyaartii ka dhacday Santiago Bernabue laba todobaad ka hor.
 
Liverpool ayaa adeegsatay hab ciyaareed daafac iyo weerar celis ah iyagoo ku soo kasbaday guul lama ilaawaan ah, Real Madrid ayaana looga baahanyahay inay dib u u soo noolaadaan, Fabio Cannavaro ayaase aaminsan in kooxda Rafa Benitez ay si adag u daba joogi doonaan nin kasta oo kubbada wata mar kale.
 
" Kulankii Bernabue, kooxda Liverpool ma aysan samayn wax dadaal ah si ay u guuleystaan, goolhayahooda Pepe Riena ayaa kubbado dhaadheer u tuurayay Dirk Kuyt marar badan." ayuu yiri Cannavaro wareysi uu siiyay AS.
 
" Haddana si la mid ah ayay samayn doonaan kulanka Anfield, waan hubaa taas. waa inaan ciyaarnaa kubbadeena ugu wanaagsan, dulqaad yeelanaa oo aan iska ilaalinaa qaladaad difaac, haddii aan gool ka dhalino waxaan ku qasbi doonaa inay banaanka u soo baxaan oo ay ciyaaraan."
 
Ruug cadaaga ayaa aaminsan inuu garanayo sida loo kala furo daafaca macangaga ah ee kooxda Reds.
 
" waa in dhamaanteen aanan weerar aadin 90-ka daqiiqo, oo aan kubbada furfurnaa lana ciyaarno ciyaaryahanadeena garbaha waxaana isagu soo aadaynaa hal iyo hal," ayuu yiri.
 
" Waa inaan ka faa'iideysanaa khalad kasta oo ay sameeyaan daafacooda waxaana jirta fursad ah inay sambariiraxdaan."
 
" Waa inaanan isku hallayn Arjen Robben, Marcelo ama Wesley Sneijder haddii aan doonayno inaan ku soo badino Anfield, inaga ma haysano shaqsiyaad sida Lionel Messi ama Cristiano Ronaldo oo kale ah, waa inaan isku duubnaanaa oo aan midownaa min ciyaaryahano, tababare ilaa dhakhaatiirta."
 
" Liverpool kama dhigna inay ka fiicantahay Madrid, waa koox abaabulan, adag oo garanaya si loo ciyaaro, waa koox is haysata waxayna wada ciyaarayeen badankood Lixdii sano ee ugu danbeysay."
 
" Aniga ahaan, waxay ila tahay inay yihiin kooxda ugu khatarsan weerar celiska iyo la dhaqaaqida kubbada, waxay kuu ogolaanayaan inaad ciyaarto, xitaa kubbada ayay ku siinayaan, marka ay fursad gadaal ku helaana waa ay kaa dhalinayaan."
 
Ugu danbeyn, mar la weydiiyay, haddii ay u soo gudbaan wareega Quarter-finals waxa uu samayn doono, Cannavaro ayaa yiri: " haddii aan garaacno Liverpool, waxaan sii deyn doonaa timahayga mar kale, balan yaan ku qaadayaa taas."
 
Kulanka dhex mari doona kooxaha Liverpool vs Real Madrid ayaa ka dhici doonaa Anfield 22:45 pm waqtiga bariga Afrika.
 
 C/Naasir Maxamede Axmed (Zerro)

zerro77@hotmai.com