Jen. Cali Caraaye Cosoble (Gacma-duulle) oo kamid ah saraakiisha sar sare ee ciidamada DKMG ah ee ka dagaalamaya gobolka Shabeellada hoose ayaa sheegay in ciidamada dowladda iyo kuwa AMISOM aysan la kulmin wax dagaallo ah, ayna haatan ku sugan yihiin garoonka iyo goobo ku dhow-dhow.
"Ciidamada dowladda KMG ah iyo kuwa AMISOM oo iskaashanaya ayaa saakay ka dhaqaaqay xerada Laanta-buuro oo bishii hore ay qabsadeen, waxaan u suuro-gashay inay la wareegaan garoonka KM-50 iyo tuulooyin agagaarkiisa ku yaalla," ayuu yiri Jen. Gacma-duulle.
Jen. Cali Caraaye Cosoble (Gacma-duulle) wuxuu intaas ku daray in dhallinyaro ka tirsan Al-shabaab ay dhowr goobood kasoo rideen rasaas xiligii ciidamdu gaareen deegaanadaasi, balse ay markii dambe iska carareen sida uu hadalka u higay, wuxuuna rajo ka muujiyay inay horay uga sii socon doonaan goobihii ay maanta la wareegeen.
Xarakada Al-shabaab ayaa sheegtay in xeelad dagaal ay uga baxday deegaannada ay la wareegeen ciidamada DKMG ah ee Soomaaliya iyo kuwa AMISOM , iyadoo dad goobjoogayaal ah laga soo xigtay inay arkeen ciidamada dowladda iyo kuwa AMISOM oo ku sugan agagaarka garoonka KM-50.
Garoonka diyaaradaha ee KM-50 ayaa wuxuu 50-km dhinaca koonfureed kaga beegan yahay magaalada Muqdisho, wuxuuna 20-km u jiraa degmada Afgooye ee gobolka Shabeellada hoose, iyadoo garoonka oo ahaa mid laga dajin jiray jaadka in kastoo sannadihii ugu dambeeyay uu ahaa mid aan shaqeynayn.
Dhanka kale Howgallo ay ciidamada dowladda KMG iyo kuwa AMISOM ka sameynayeen labadii maalmood ee lasoo dhaafay waddada isku xirta Muqdisho iyo Afgooye ayaa waxay kusoo qab-qabteen askari dhac u geysanaysay dadka shacabka ah, iyadoo dhowr askari oo kalena lagu dilay howgalkaas.
Saraakaal u hadlay ciidamada dowladda KMG ah ayaa sheegay in howagllada oo ahaa kuwo qorsheysan ay kusoo qabqabteen in ka badan 40-askari oo dhac geysanayay shacabka ayna sidoo kale ku dileen askar kale.
"Howgalladu waxay ahaayeen kuwo xaqiijinayay ammaanka waddada dheer ee isku xirta Muqdisho iyo Afgooye, waxaana lagu dilay dhowr askari oo diiday inay hubka dhigaan, in ka badan afartan askari oo kalena waa la qabtay," ayuu yiri sarkaalkaasi u hadlay hay'adaha ammaanka ee dowladda KMG ah.
La og askarta lagu dilay howgalka tiradooda, ayaa haddana waxay howgalladan noqonayaa kuwii ugu horreeyay oo noocooda ah oo ay ciidamada DKMG iyo kuwa AMISOM ka sameeyaan waddada isku xira Muqdisho iyo Afgooye.
Ceelqaboobe.com
Saraakiisha ciidamada DKMG ah ee Soomaaliya ayaa sheegay inay la wareegeen garoonka diyaaradaha KM-50 ee gobolka Shabeellada hoose.
Back
to home
Top
of the Page
