Allaha u naxariistee waxaa xalay kooxo hubeysan ku dileen degmada Xamarweyne ee gobolka Baaadir maareeyihii garoonka diyaaradaha ee Muqdisho, Ibraahim Imaam Xalane, iyadoo kooxaha dilka geystay ay u suurogashay in ay ka baxsadaan goobtii ay falkaasi ka geysteen.

Qaar ka mid ah shacabka degmada Xaramar weyne ayaa sheegay in maareeyaha ladilay xili uu kasoo baxay masaajid ku yaal degmadaasi, iyadoo dilkiisa ay aad uga nexeen Eheladiisa iyo guud ahaan dadkii aqoonta u lahaa marxuumkaasi.

Mas'uuliyiin ka tirsan maamulka goboka Banaadir iyo golaha xukuumada dalka ayaa ka hadlay dilka maareeyahawaxa ayna sheegeen inay ka dambeysay Al-shabaab, laguna jiro howgallo la doonayo in lagu soo qabto kooxihii ka dambeeyay dilka maareeyaha garoonka diyaaradaha ee Muqdisho.

Guddoomiyaha degmada Xamarweyne C/llaahi Sahal Gardhuub oo la hadlay dilkaasi kadib saxaafadda ayaa sheegay in ay baxsadeen kooxihii dilka geystay, islamarkaana ciidamadiisu ay rasaas ku fureen balse ay ka baxsadeen.

"Laba wiil oo dhuudhuuban ayaa maareeyaha dilay, waxayna u baxsadeen dhinaca degmada Xamar-jajab, inkastoo rasaas laga daba-riday balse way baxsadeen," ayuu yiri C/llaahi Sahal Gardhuub Guddoomiyaha degmada Xamarweyne oo intaas ku daray in uu aad uga xunyahay falka dhacay.

Dad badan oo shacab ah ayaa loo qabqabtay dilkaasi sida ay sheegeen mas'uuiyiinta dowadda waxayna intaas ku dareen in ay sameyn doonaan baaritaanno ku saabsan sidii loo soo qaban lahaa dadkii geystay falkaasi,hase yeeshee hore ayaa ciidamada dowladu ugu guuldareysteen soo qabashada kooxo sidaan oo kale dil ugu geystay dad mas'uuliyiin iyo shacab isugu jiray oo lagu dilay magaalada muqdisho.

Wasaarada arrimaha gudaha dowladda Soomaaliya ayaa dhawaan sheegtay inay sugtay ammaanka Muqdisho iyadoo weli magaalada ay ka dhacayaan falal lagu ugaarsanayo dadka bulshada ka dhexmuuqda, taasi oo loo aaneeyo in loo dilo hadba xilka uu hayo,dhaqaalaha uu leeyahay ama magaciisa oo caan ah darteed.

Baaritaanno adag oo ay sameynayaan ciidamada dowladdaayaa maanta laga bilaabay Degmooyinka Xamarweyne iyo Xamarjajab, iyadoo halka lagu dilay maareeyaha ay dhowr boqol oo mitir u jirto madaxtooyada Soomaaliya.

Dhanka kale Wasaarada Dekedaha, gaadiidka, cirka iyo dhulka ayaa ugu baaqday Hey'adaha amniga dowladda in baaritaan ay ku sameeyaan dilkii xalay loogu geystay degmada Xamarweyne Maareeyihii garoonka diyaaradaha Aadan Cadde ee magaalada Muqdisho Ibraahim Iimaan Xalane.

Agaasimaha Wasaarada Dekedaha, Gaadiidka cirka iyo dhulka Maxamed Cismaan Dhagaxtuur ayaa sheegay inay ka xun yihiin dilkaas, waxaana uu ka dalbaday Hey'adaha amniga dowladda in baaritaano deg deg lagu sameeyo, si gacanta lagu soo dhigo Kooxihii ka dambeeyay.

Maareeyihii garoonka diyaaradaha Muqdisho oo xalay maqribkii kooxo hubeysan ku dileen agagaarka Xaafada Via Roma ee degmada Xamar weyne ayaa waxa uu dilkaasi cabsi iyo wel-wel badan ku abuuray mas'uuliyiin badan oo ka mid ah dowlada Soomaaliya.

Dilka Mas'uulkaasi ayaa noqonaya kii u horeeyay ee lagu dilo degmada Xamarweyne ee Gobolka Banaadir, iyadoo uu qeyb ka noqonayo dilalka qorsheysan oo mudooyinkii u dambeeyay ka dhacayay qaar ka tirsan degmooyinka Gobolka Banaadir

ceelqaboobe.com

calidhuux86@yahoo.com

calidhuux88@hotmail.com